lundi 22 février 2010

الطالب و الفواييه والكاربوناطو و المستقبل



هاك وليت طالب
شهادتك في جيبك والنبي مولاك
استنا الساعة ، شوف هاك "الشاعرية" في كمة "طالب" كلمة مشتقة بالدارجة مالطلبة ديراكت يجي في مخك واحد "طالب" يدو ممدودة يا كريم متاع الله
طالب هي التعريف العربي لمايسمى بالنقنوقي "إتيديان" وهي فصيلة تطلب زادة أما ظاهر فيها مفرهدة شوية -لكن مش برشة- على المعدل العام
حاصيلو نرجعو للطالب
الطالب عبارة عن فئة اجتماعية منبوذة ، ماهياش محبوبة ، تقلق ، مشبوهة التوجهات والنيات ، مصروفجية ، وغير منتجة
ساعات يتكلم واحد : تي اشبيه هالقزدور ؟ - راهو طالب - انشاله ماعندك سو ، الله غالب ، على مراد الله

تي هوكا عاد تترسم في الكلية وتعمل أبونمان في الكار وترسم في المأوى الجامعي (شوفو معايا كلمة مأوى ؛ مأوى عجز مأوى سيارات)
والا مبيت (بات يبيت مباتا في المبيت
وكان ما تحبش تبات رايض والا تبيت الحس
يبيتوك



وما تنساش الجيتون وما أدراك تلك الحياصة المعدنية
الجيتون هو سمسم عجيب لعالم آخر
تشد الجيتون وتشد الصف في كولوار عرضو ميترو
الحيوط بالفايونس الأبيض المتصيفر للسقف
السقف الي علو 4 ميترو
في نهاية الكولوار تتم عملية تزويدك بوجبة دسمة
لتستطيع أن تقاوم وتجاهد من اجل العلم في القيلولة


ونهاية المطاف
المشاركة في الحلقات الشيقة من مسلسلات تلفزية راقية حاجة ممكنة جدا خاصة واذا ما لقيتش وين تبات